Mir fällt seit langem auf: Nicht wenige der Presseerzeugnisse, die ich zu Hause habe, und ein noch größerer Teil der Zeitschriften, die ich im Wartezimmer lese, bringen in schöner Regelmäßigkeit Vorschläge für Gastgeber. Toll, was da im Rahmen moderner Gastlichkeit alles geboten wird. Und immer für ganze Rudel von Gästen. Wenn diese Blätter recht haben und das Einladen und Bewirten von Gästen in diesem Maß selbstverständlich geübte Praxis ist, dann sind Uschi und Norbert (und viele, viele andere) wohl die Ausnahme. (in der Saarbrücker Zeitung am 9. September 2008) Ihr hann jòò nie Zeid Wirglisch scheen, wem'má Leid had, mid denne má als e paa Schdunne schwäddse, esse, dringge kann. Mòòl sesamme auser Haus, mòòl zu Besuch hiwwe odder driwwe. Unser Urlaubsbekannde Uschi unn Norbert hann dòòzu ihr eischne Erfahrunge. Má wohne kaum finf Minudde ausenanner, also ham'má neilisch hie sesamme gehuggd unn vázehld. Vum Urlaub, dann nòò unn nòò vum Hunnerdschde ins Dausendschde. So ham'má erfah, sisch riwwer unn niwwer besuche, das hädde sie gudd fuffzehn Jòhr nim'meh gemachd. Das wär so kumm: Sie hädde gäär Leid um sisch gehadd unn efdersch e ganser Puddsche ingelad. Im Summer hädde se draus gehuggd. Middaas devòr hädde sie zwei dann gekochd unn vòrbereid, was se sisch mid dinnem Geldbeidel leischde kunnde. E paa Jòhr wär's rischdisch glòòr gelaaf. Bis es Uschi länger grank worr wär, unn wie's widder uff de Bään waa, had's ihne váwidschd. Wo se jedds nimmand inlade kunnde, hann se sisch umgeguggd, awwer niggs had sisch gedòòn. Dòò eerschd wär's ne uff äämòò glaa worr, dass sie selwer so gudd wie nie jemòòls irjendwo ingelad ware. Eerschd hann se sisch vòr isch selwer geschämd, weil se känn Erbsezähler wollde sinn. Wie's awwer so gehd: Huggd so e Gedangge mòò im Kobb, melld'á sisch ach zu Word. Wie im Schbädsummer jemand im Schbass gefròòd had, ob's disjòhr niggs gäb, had es Uschi de Deiwel geridd: "Nä", had's gesaad. "Mir kinne jòò disjòhr nidd. Wenn sunschd nimmand ebbes machd, werd wohl niggs draus." Dòò wäre se dann siis-sauer ingelad worr, gleisch nòò'm Kaffee, dass se zum Naachdesse widder dehemm wäre. Die Gaschdgewwer hädde Wein gedrunk, awwer sie selwer hann forr's zwedde Glas Schbrudel so lang misse beddle, dass'se uff's dridde vázischd hädde. An die Erdniss wäre se aa nidd draan kumm, awwer die Leid hädde se ach im Nullkommaniggs selwer all gridd. Unn wie die dann aangefang hädde, uff die Uhr se schiele, wäre se nòò rá Schdunn freiwillisch gang. Dann hädde sisch annere gemelld, se wollde sisch mòò rewangschiere unn käme sie forr e scheener Sunndaa middaas abholle. Im Audo schdelld sisch raus: Die Fahd is in die Pals gang, dòò hann die ebbes hinbringe misse. Am Ziel sinn sie zwei in e Gaadewirdschafd gehuggd unn nòò rá Schdunn abgeholl worr forr hemmsefahre. Seldsam genuch, awwer noch hann se nidd geschald. Die Gall is ne eerschd iwwergelaaf bei rá rischdisch gudder Freindin. Die wolld besonnersch raffinierd um jedi Inladung rumkumme. Jedes Mòò, wenn se sisch dursch e dummer Zufall iwwer de Wääsch gelaaf wäre, hädd die als eerschdes gesaad: "Má heerd jòò gaaniggs meh vun eisch! Isch dääd eisch jòò so gäär inlade. Awwer ihr hann jòò nie Zeid!" Unn dann is se dabber abgehau, dass nidd doch mòò was passierd. Finf, seggs mòò is das so gelaaf. Dann hann sie gesaad: "Mir hann jedds vill Zeid." Unn die had gesaad: "Das freid misch forr eisch!" Dann had se dabber es Thema geweggseld unn dann waa die Freindschafd aus. Was e komblizierdi Vòrgeschischd! Forr niggs falsch se mache, wollde mir se nom'mòò inlade. Awwer se hann känn Zeid gehadd. Unn jedds? Mundart • Meine SZ-Kolumne Wenn Dregg zu Mill werd Wenn Dregg zu Mischd werd, will á gefah werre. Had die Oma gesaad. Heid saad má: Wenn Dregg zu Mill werd… Der will nidd bloos gefah werre, der had grooskoddserische Aanschbrisch. Was e Mischd!!! (Das beesere Word dengg'isch nur.) Egal wie: Mill werd allmählisch e Thema forr Indelleggduelle. Mir dummes Volg grien villeischd Volgshochschul-Kurse, als Legdsjone z.B.: Wie behandeld má linksdrähjender Biomill? Wie rum kummd de Griff vun dá Milltonn bei Vollmond an ungrade Daache, wenn de Fahrer vum Millaudo Linkshänder is?  Gudd, noch is das iwwerdrieb. Awwer wie lang noch? Bleiwe má nur beim Griff vun dá Milltonn: Was is das? Der, wo isch die Tonn zum Rolle greife? Odder owwe der vum Deggel ? Muss má wisse – weje der Rischdung, in der má die Tonn an die Schdròòs muss schdelle, sunsch werd se villeischd nidd geläärd. Is es Millaudo e Hegglader, muss die Tonn mid em Griff zu dá Schdròòs schdehn, unn umgekehrd bei Seidelader,. Is doch nedd, má lernd ach mòò ebbes iwwer Millabfuhrteschnigg. Dòò wääs má als gewehnlischer Schderblischer vill se wenisch, unn Allgemeinbildung is wischdisch weje dá Globalisierung. So, awwer well Sord "Lader" laafd bei uns? Gans äänfach: Schdell disch morjns ab vier Uhr an die Schdròòs, wenn's Millaudo aanriggd, unn fròò! Odder má lossd's druff aankumme. Näwedraan die schdelle ihr Tonn so unn mir annaschd rum. Gligg gehadd, se werre alle zwei läär, hann awwer grumm-graddlisch vádrähd dòò geschdann, mi'm Griff zur Seid. Jedds, iwwer e Monad hinnenòò, waa im Amdsbladd se lese, bei uns muss de "Zuuchgriff" Rischdung Schdròòs schdehn. Awwer isch schiewe die Tonn! Gild die Vòrschrifd ach forr de Schiewegriff? Odder koschd Schiewe eggsdra? Das soll wohl vánewweld werre. So weldbeweeschende Griff-Brobleme solle ablengge devun: Die Millabfuhr schlaad uff – dursch die kald Kisch. Die Tonn sowisso. Schberrmill koschd aach eggsdra. Nidd zum Abzogge! "Vermüllung des Straßenbildes" wolle se vámeide. Gebbd's wohl nom'mòò meh "Vermüllung" vun Wald unn Wiese. Hinner de Glaskondääner, in fremde Tonne odder so had's sowisso nie uffgeheerd. Die Millvábrennung ham'má eerschd gebrauchd weje unsrem ville Mill, jedds ham'má so wenisch, dass se vun sunschwo impordiere wolle. Bei vill Mill schlaad'á uff, weil má vill hann, bei wenisch schlaad'á uff, weil's wenisch is. Má bringe schunn de Glasmill in de Kondääner, sauwer geschbiild, in de gelwe Sagg kummd  läffelreiner Blasdigmill, Baddrieje in die Sammelbox, Elegdroschrodd zum Wärdschdoffhof. Forr kabuddne Energieschbaalambe holld má sisch Urlaub, dass má es Sondermill- Audo uff'em Maagdbladds váwidschd. De Grischbaam fahd má killomederweid uff de Sammelbladds. Schleschde Glääder gridd die Lumbesammlung, gudde es Sozialkaufhaus, Meddalle es Schroddaudo. De Biomill had sei griini Tonn, mid der má im Summer Schimmel unn Migge zischde kann. Unn Babier kummd in die blau Tonn. Fähld bloos noch die Tonn forr Millabfuhrvòrschrifde. Awwer so groose Tonne gebbd's wohl känn! Manchmal spricht so eine Kolumne ihren Lesern so sehr aus dem Herzen, dass sie es irgendwie los werden möchten. Bei diesen Gedanken hier (in der Saarbrücker Zeitung am 7. Februar 2011) waren es bis zum Mittagessen schon über zwei Dutzend Anrufer – und das war noch lange nicht alles. Noch Wochen später wurde ich darauf angesprochen. Ich kann mich noch an Zeiten erinnern, in denen das eigene Telefon nicht unbedingt die Regel war, und auch öffentliche Münzfernsprecher, so hießen damals die Telefonzellen, waren dünn gesät. Drinnen hing ein Schild: Fasse dich kurz! Es wäre interessant, Vergleichszahlen zu sehen: Welche Zeit wurde damals vertelefoniert und um wie viel hat sich das vervielfacht. Und welcher Anteil dieser Zeit wird sinn- und nutzlos verplempert durch überflüssige Ansagen, endlose Begrüßungsrituale, Warteschleifen und ähnlichen Quatsch. (in der Saarbrücker Zeitung am 30. Juli 2005) E unheimlisch langi Läädung   Was ham'má doch vòr e paa Jòhr am Telefon noch selwer dengge misse! Saa' má'mòò, häddsch aangeruf. Dann hasch'e selwer misse rausfinne: Melld sisch jemand - odder nidd? Wenn jòò, is'es jemand, wo de wolldschd? Wenn nidd: Werd die odder der geruf? Sollsch du nòm'mòò aanrufe odder rufe die serigg? Odder, selde genuch, kimmerd sisch sunschd wer um disch? Melld sisch degeje nimmand, is glaa: Die sinn nidd dòò, odder die kinne nidd, odder se wolle nidd. So waa das dòòmòòls. Im Endeffegd wie heid! Dòò wääsch'de - genau geholl - aa bloos: Ruf eewe schbäder widder aan. Awwer frihjer hasch'e das gans ohne fremdi Hilf misse endscheide. Unn das Glòòre: Jeder had's geschaffd! Dann is'es Gehirn endlaschd worr. E Tonband vum Aanrufbeandworder had dá die Denkaawed abgeholl unn gerauschd unn gegwäägd, es wär nimmand dòò. Doll! Das waa nadiirlisch ofd genuch aach gelòò. Aangerufne kunnde so eerschd mòò waade, wer ebbes wolld unn vòr allem was. Dann kunnde se immer noch abhewe unn saan, grad wäre se die Diir rinkumm. Mansche ware, scheind's, ihr halwes Läwe immer grad vòr dá Diir. Ofd had má ach em Abbarad bis zum Piebse e Schbrischelsche dirfe vázehle, bei jedem neie Aanruf widder unn widder, bis má ab'em sibbde Mòò bloos noch beese Saache gesaad had - nòò'm Uffleje. Umsunschd ware die Aanrufe jòò, uff dá Telefonreschnung awwer alles annere wie forr niggs. Awwer ach das is jeddse Schnee vun Anno Dunnemòòls. Mòò aangenomm, má wolle heid fròòe, ob die Firma Graud unn Riiwe middaas um drei noch uff had. Fròòe? Wenne dann? Schwäddse uff Band odder so was? Zu was dann, wenn's doch nimmand abheerd? Niggs inngeschald; wer meeschd dann schunn wisse, was du willschd? Zuheere sollsch'de! Bring awwer dei Drommelfell in Sischerhääd! Driwwe grääschd, wummerd unn feddsd Mussig, grauehafd schleschd, awwer laud, gemischd mid Maagdschreier-Schdimme: "Graud unn Riiwe Indernäschenell. Ihre Verbindung wird aufgebaut. Sie werden in Kürze mit einem freien Platz verbunden." Gugg aan: Indernäschenell. E indernadsjonaler Tande-Emma-Konzern, seid de Scheff mòò in Luggsebursch getankd had. Serigg zum Telefon: Die Mussig schwelld noch aan. Dann schwäddse se englisch mid'dá, so glingd noch gans gewehnlischer Fubbes nòò grooser weider Weld: "Please hold the line!" Nòò'm zehnde Mòò denksch'de bloos noch: "Please hold die Glabb!" Awwer's gehd gnadelos weider: "Graud unn Riiwe! Immer für Sie da." Doll, wenn'isch das ach merge dääd! Mache die grad Kaffeepaus odder Konkurs? Odder sinn'se alle vier zuschdännisch forr die Telefonzendral - unn desweje känner? Wenischer negativ: Sinn'se grad forr jemand anneres dòò unn desweje voll ausgelaschd? Die Gebihre zähle unn zähle unn inzwische hann se es Brogramm vier Mòò durschgeduddeld. Jedds kummd ebbes Neies. E anneri Schdimm saad: "Wenn Sie die Verbindung aufrecht halten wollen, wählen Sie bitte die Eins. Wenn Sie die Verbindung beenden wollen, wählen Sie bitte die Zwei." Also, was mache? Isch wähle Meeschlischkääd drei unn leje unerlaubd uff nòò zwansisch Minudde unn rigge'ne perseenlisch uff die Pell - ohne Telefondròhd dezwische - wie zu Zeide vun Poschdkudsche unn Briefdauwe! Alles waa im Nullkommaniggs erledischd. Nur dass' isch am Telefon váhungerd wär: Das kinnd normalerweis nidd sinn - bei so'rá deirer Aanlaach. E unheimlisch langi Läädung muss'isch wohl váwidschd hann; die gridd ach aller Fordschridd niemòòls kirzer. Nidd bei der glään Firma unn bei groose schunn grad gaanidd. Ach wo! Je greeser die Firma, umso meh Graud, umso greesere Riiwe, umso dummeres Geblärrds im Heerer, umso längere Läädunge, umso hehjere Koschde forr's iwwerflissische Waade, wo niggs rauskummd debei! Mache die halwe-halwe mid dá Telefonfirma? Dääle se das Geld, wo se emm abluggse mid unneedische Waadezeide? Isch hann dòò gans beese Ahnunge. Awwer villeischd bin'isch ach bloos e Fordschriddsfeind. Der Name der Rose? Die Rosen, die ich kannte, hießen alle Rose. Das immerhin konnte ich mir merken. Das bedeutet: Es ist vielleicht nicht Hopfen und Malz verloren. Andererseits: Ich vergesse tatsächlich so oft Namen, die ich eigentlich kennen müsste! In aller Regel fallen sie mir auch wieder ein, irgendwann. Davon habe ich dann wenig in der praktischen Nutzanwendung. Aber immerhin vermittelt es mir die, wenn auch unzureichende, Beruhigung, dass die Informationen noch(!) gespeichert sind. (Ein gekürzter Text war am 29. Juli 2011 in der Saarbrücker Zeitung zu lesen) Name behalle isch nie, awwer … Saan Se mòò, kenne Sie das aach? Name behalle isch nie, awwer Gesischder, die vágess isch immer. Debei waa das nidd immer so. Isch dengge alsmòò an mei eerschde Bankjòhre hinnerm Schalder. Ohne Kombjuder! Ohne Geldaudomade! Wenn um de Eerschde am Daa seggshunnerd Leid unn meh an dá Kass Geld wollde. Dòò waa niggs mid ins Kondo gugge, ob genuch druff is. De Kombjuder waa im Kobb: Zum Kundegesischd vòrm Schalder Kondonummer, Name, genuch druff odder liewer gugge? Weg bin isch dord 1971. Noch in de 90er Jòhre kunnd isch nidd dursch Sabrigge gehn, ohne dass má zu e paa Duddsend Gesischder de Name ingefall is, die Kondonummer unn die finansielle Váhäldnisse. Unn heid? Nòò gnabb virdsisch Jòhr im Dorf wisse immer noch meh Leid, wo se misch hinduun (em Moni seiner), wie umgekehrd. Wer das in de falsche Hals gridd, mennd villeischd: Was is'n das dòò forr e Schdoffel! Das heischd forr misch: Finn geschiggd raus, wer das jedds is. Wie vòr paa Jòhr am Völglinger Bahnhof beim Waade uff de Bus. Es schneid. De Bus kummd unn kumm nidd. Mid dá Zeid kummd má ins Geschbrääsch. Näwe mir änner leed uff äämòò los, gleisch mid "du". Aha mir kenne uns nähjer! Isch grawe im Gedäschnis: Wer is das ? Er kummd má irjendwie bekannd vòr, awwer wohär? Es waa nidd raussegrien. Bis de Bus kummd unn er inschdeid. In sei Bus, nòò Groosrossle, nidd in meiner nòò Differten. Unn mir werd glaa: Der kennd misch so wenisch wie isch ihne, nur machd á sisch wenischer Gedangge driwwer. Peinlischer werds, wenn dá Leid an ungewohnde Schdelle begeeschne, dezu ach noch annerschd aangezòh! Má glaabd nidd, wie weise Kiddel Mensche váännere, Dogder odder Granggeschweschder, Vákäuferin in dá Bäggerei. Misch freid schunn, wem'má denòò infalld, wenne isch uff Vádachd gegriisd hann, villischd jemand, wo seinerseids simmelierd, wer isch bin. Isch hann meim Aadsd mei Lääd geglaachd. Der waa nidd besonnersch beunruischd. Er had misch bloos gefròòd: "Sind Sie sicher, dass Sie sich das alles merken wollen, Herr Paulus?" Paulus? Aha, hann isch gedenkd, der also aach! Drooschd waa's känner. Unn vun weje merge wolle: Isch will má lang nidd alles merge. Nur selwer beschdimme, was unn was nidd. Siehn isch e Schauschbieler im'me Film, meeschd isch de Name wisse. Unn was falld má in? Wo isch ne mòò gesiehn hann: in demm Film, im Urlaub in Villach, wo's hinnerhär so geräänd had, odder waa's bei dá Tande Anna, der Tadord mid demm Gummibood? Wenne er geschbield had: der Forscher, wo vásuchd had, irjendwie ebbes …, wo der anner.., odder nää…, er waa Paschdor.. ! Wer debei waa: so e blondi, wo em Elfriede geglisch had uff demm Bild mid em Gibsbään.So Zeisch, grusselisch! Awwer noch niggs geje vòrgischder. Dòò kummd má änner endgeje. Isch gugge ihne aan, er misch. Kenne má uns? Ja, das is de Dings. Isch griise, er misch aa. Isch dengge: War á's wirglisch? Isch dräh misch um, im selwe er sisch aa. Mir gugge uns aan. Was soll isch saan: Er waa's gaanidd. Awwer es Dollschde: Isch, isch waa's aach nidd. Isch saan's doch: Name behalle isch nie, nur Gesischder vágesse isch immer. Peter Eckert, aufgewachsen in Burbach, lebt seit 1972 in Wadgassen-Differten. Der obige Beitrag, vom Autor gelesen, ist in Kürze im Internet zu hören, falls nicht unvorhergesehene technische Probleme auftreten: www.eckertpeter.de Ein Hoch den Fachleuten! Ehrlich! Wer etwas von seinem Fach versteht, hat Achtung und Respekt verdient. Wird eine solche Kapazität allerdings auf offensichtliche Unstimmigkeiten hingewiesen, sollte sie eine befriedigende Antwort geben können. Und wollen! Und vor allem: auch wirklich geben!! Das ist die eine Seite des Themas. Das andere: Ich musste leider allzu oft eine Phänomen beobachten, das ich mir nurunzureichend erklären kann: Leute, die in einem bestimmten Gebiet einen Wissensvorsprung (manchmal auch nur einen Machtvorsprung) haben, bauen nicht selten in sich ein Bewusstsein des Inhalts auf, dass sie jetzt alles besser wissen. Gerade so, als habe es den Begriff des Fachidioten oder des zerstreuten Professors real nie gegeben. Die Ahnung all allään Neilisch had misch jemand schwär gesenggeld, weil isch nidd wolld wie isch solld. Wer? E Kabadsidääd, wo vill geleischd had unn uff so gudd wie alles e Andword wääs. Nidd immer die rischdisch. Nadiirlisch, wer wääs schunn alles? Alles besser wisse, das soll vòrkumme. Awwer alles wisse? Nää! Droddsdemm: Wie das als is mid Leid vum Fach: Irjendwann laafe die iwwer, unn se schlaan dá Andworde um die Ohre, ohne dass de fròòschd. Nidd so schlimm wie Leid, wo finne, was noch nimmand válòòr had, awwer rischdisch Schbass machd's aa nur selde. Serigg zum Senggele. Isch hann bloos gesaad gehadd: "Mach du, wie du willschd, isch mache, wie isch's forr rischdisch halle!" Bädsch, waa de Gnaadsch dòò. Wie isch dezu käm se dischbediere! Mid Fachleid! Als Laie, also als Volldebb, das is nidd gesaad worr, awwer se iwwerheere waa 's droddsdemm nidd. Isch hann gesaad, isch hädd doch nidd demid aangefang. Had awwer nidd gezòò. Weil: Fachleid sinn jòò Fachleid! Weil: Die kinne nur im Reschd sinn! Weil: Se hann die Ahnung all allään! Vun der Sord gebbd's vill meh, wie má mennd. Gejeiwwer de Laie, also de Dummkäbb, halle se sesamme. Das heischd awwer niggs, wenn Fachleid uff Fachleid dreffe, unn der ään saad so unn der anner so. Dann werd's glòòr! Jedds kann der annere nur e unfähjischer Blender sinn, had känn Ahnung, beliid die Weld mid Zeisch, wo längschd widerleed is odder had e gans neiji Theorie, die jeder mid me bisje Váschdand soford als Fubbes endlaave kann. Isch genn's zu, eijendlisch bin känn Kämfer; selbschd beim Danse will isch misch giidlisch äänische. Gedankd werd's emm nidd. Nää, vill Leid menne, sie kinnde, ach was, se misde de Doddel mid dá mache. Umso meh wunnere se sisch, wenn isch dann - bis dòòhin unn nidd weider - uff äämòò e gans schdurer Gluddskobb bin. Unn in meinem Fall waa's so weid. Niggs geje Leid, wo ebbes vun ihrem Fach váschdehn. Die brauch má wie's liewe Brood. Awwer die sollde ach seid em alde Sokrates denne Sadds kenne: "Isch wääs, dass isch niggs wääs!" Odder vum Aposchdel Paulus: "Unser Wisse is Schdiggwerg!" Hädde Fachleid immer reschd, käm aus Fukushima immer noch Schdrom schdadd Schdrahle, wär nidd iwwer Monade Eel ins Meer gelaaf, hädde känn Schdrolsche mid dá Finansgrise die halb Weld faschd bankrodd gemachd. An de Pole dääd's Eis nidd schmelse, Solarschdrom wär teschnisch sinnlos, die Bahn käm nòò Fahblan, Gammelfleisch gäb's nidd, Deidschland wär noch gedääld, die Titanic dääd schwimme, de Zebbelin flieje. De Euro wär schdabil, es Internet sischer, unn mir hädde es beschde Fernsehn vun dá Weld. Vun rá Diäd gäb má dinner, unn Penicillin unn Co. hädde vill Grankhääde ausgerodd. Wer Griesch aanfangd, dääd ne gewinne. Die Erd wär e Scheib, Männer es schdaage Geschleschd, de Mensch die "Krone der Schöpfung", Leischdung dääd sisch lohne schdadd de Elleboo'e unn grooses Maul. Hädde Fachleid immer reschd unn dääde nidd ofd ihr eischnes Sibbsche koche, wäre Schdeiere gereschd unn Rende sischer. Die Reschdschreiwung wär reformierd unn es gäb nidd mehr Fähler wie vòrhär. De näägschde GAU käm nidd vòr hunnerddausend Jòhr. Die Weld wär nidd forr all, Mensche, sondern e Schbielwies forr Fachleid, weil: Die hädde die jòò Ahnung all allään. Wenn! Peter Eckert, aufgewachsen in Burbach, lebt seit 1972 in Wadgassen-Differten. Am 21. September 2011 war es in der Saarbrücker Zeitung das Thema des Tages “Deutschland auf dem Höhenflug des Glücks – Studie bescheinigt Bundesbürgern hohe Lebenszufriedenheit”. Dabei geht es um den Glücks-Atlas 2011, der Deutschland einteilt in 19 Regionen und für diese durch repräsentative Befragung von 11000 Privathaushalten und 1800 weiteren Bundesbürgern Zufriedenheitswerte zu Themen wie Einkommen, Erwerbstätigkeit, Bildung und Gesundheit ermittelt. Das Ganze liegt in den Händen von Forschern der Universität Freiburg und des Instituts für Demoskopie Allensbach. Oh gligglisches Land! Is doch e alder Hudd: Schdadisdig, dòòmid kam'má alles beweise - samd em Gejedääl. De Herr Churchill wolld sogaa sellemòls känner Schdadisdig glawe, wo á nidd selwer gefälschd hädd. Dòò rennd á bei mir uffne Diire in, immerhin hann'isch mid Schdadisdigge im Beruf iwwer Jòhrzehnde die Weld begliggd. Unn dann bringd die Sabrigger Zeidung e gansi Seid iwwer e schdadisdisches Meischderwerg, de "Glücksatlas 2011": Mir is es Herds uffgang. "Deutschland auf dem Höhenflug des Glücks", waa se lese. Uff zwei Schdelle hinnerm Komma werd vòrgereschend, wie gligglisch mir sinn unn, faschd noch wischdischer, wie meh odder wenischer gligglisch anner Leid in unserm gligglische Land. Is das nidd scheen? Die Deidsche sinn sefriede wie seid zehn Jòhr nim'meh. Na ja, Unnerschiede misse aa sinn, wo käme má sunschd ach hin. Die sidd má uff dá Landkaad unn dá Skala mid de Gliggs-Punkde. Faschd wie Schul-node: Zehn Punkde forr "perfeggd gligglisch". Nullkommaniggs forr "Hobbe unn Mals válòr". Mòò ehrlisch: Hädde die misch gefròòd, isch wisd nidd, bei wivvel Punkde isch misch inreihje. Wie sefriede bin isch dann? Wenn's emm mòò rundum gudd gääng, dääd má das jedem uff die Nas binne? Unn wenn's gans mies wär? Jòòmere dääd má villeischd ehjer, awwer doch nidd so, dass es känner glawe dääd. Also: Es kinnd hald alsmòò besser sinn, awwer, gans unner uns, aarisch ofd ach vill schleschder. Also saad má irjendebbes, je nòò Laune, Wedder, Daachesform, Kondoschdand unn nòò demm, was má mennd, was die heere meeschde. Uff die Weis werre Zahle iwwer Zahle sesammegedraa unn dòòdraus de Durschschnidd gereschend. Die Leid, wo so Zahle sammle, hann Deidschland in 19 Reschione unnerdääld. Immerhin, o Wunner: Mir leie genau in dá Midde - mid 6,91 Punkde uff Rang 10. "Mir" sinn allerdings nidd mir Saalänner allään. Uns kam'má aus der Lischd gaanidd erauslese, se hann uns sesamme geschmiss mid Rheinland-Pals.Das dirfd so manschem saalännische Herds e Schdisch genn. Zudemm: Mir ware frihjer gligglischer! Abgerudschd sim'má uff vum Bladds drei mid 7,17 Punkde vòr gnabb zwansisch Jòhr, selbschd vòr zwei Jòhr had's noch mid 6,99 noch uff Bladds vier gereischd. Gudd, dass má's gesaad gridd, sunschd hädd má villeischd gaanidd gemergd, dass má um 0,26 bzw. 0,08 Gliggspunkde ungligglischer is. Isch ham'misch gefròòd, wer uff die Idee kummd, so Reschnunge uffseschdelle, unn kunnd's faschd nidd glawe: Die Poschd! Im Ernschd: Deutsche Post. Seid's käm'meh Poschdämder gebbd unn kaum noch Briefkäschde, suche die scheind's nòò Ideeje, wie se das ville Geld gligglisch widder loswerre, wo se inschbare bei Personal unn Kunnedienschd. Weil: Billisch is so e Gliggsadlas beschdimmd nidd. So e digger Berischd, lange Lischde, bunde Schaubilder unn Erkenndnisse, so uffreeschend wie e Schlòftabledd. Es Wesendlische kinnd má wisse, wem'má Aue und Ohre uffhald unn de gesunde Menscheváschdand unn es Herds nidd schdillgeleed had. Wemm das zu langweilisch werd, der kann noch e paa alde Horoskobe, Kaffeesadds unn e Wirfel dezuholle. Wär beschdimmd billischer unn das scheene iwwrische Geld kinnd má ach sinnvoll ausgenn, odder? Peter Eckert ist aufgewachsen in Saarbrücken und lebt seit fast 40 Jahren in Wadgassen-Differten. Diesen Text und viele andere gibt's zum Lesen und Anhören auch auf "www.eckertpeter.de".